Turnfahrtsbericht

Geschrieben und vorgetragen an der HV 2013 von Lukas Wey

Also zerscht mol wöti vorus schickä, vätraued niä amä USB Stick asä blind, wiä ich das gmacht ha.

I ha noch dä Turnfahrt ziemli bald dä Turnfahrts Bricht fertig gha, hanen ufem USB Stick gschpeicheret und ha denkt, das seg guet so…….. Isch huerä schlächt cho.

Mer hets denn nämli dä huerä Stick glupft und min ganzä 2 1/2 Sitigä Text het sich eifach in Luft ufglöst.

Janu, denn bini nomol anä ghockt und ha dä ganz Bricht nomol ahgfangä schriebä.

Das isch au dä Grund, dass dä Turnfahrt Bricht nur no uf wogä Vämuetigä basiert.

 

Turnfahrtsbericht 2012

 

Also guet, i fang mol domit ah, wo mer üs am Morgä im Adler troffä hend.

Äs het  än super z Morgä geh. Mhm, Bier am Morgä, vätriebt Chummer und Sorgä.

Däzue hemmer au ä schöni Fleischplattä übercho.

Und wo isch dä Zuli? Het är eigentli nöd au wöllä mit cho?

Jo guet, mer hend mol abgwartet, vilicht chunterjo no.

Wo mer üs gschtärkt gha hend und jedä sis Bier gext gha het, dä Zuli isch immer nonig umä xi, simmer denn ufbrochä.

Gmüetlich simmer denn, bi super Wätter zum Bahnhof flaniert, wo mer denn is Poschtauto igschtigä sind.

In Roggwil hemmer denn das 4 räderige, gälä Dings väloh und sind denn äs rächts Schtuck marschiert bis mer zu dä Beiz Pädorogg…. Tschuldigung, i mein Padorogg cho sind. Döt hets hets denn äs schö chüehls Blonds über dä Durscht abä geh.

Aber scho bald druf abä het üs dä cheibä Kevin scho wieder vo dä Schtüehl ufgjaggt und mer sind denn mürrisch wieter tschumplet.

Zum Glück isch scho bald di nögscht Schpilunkä, s Reschtaurant Frohsinn cho. Aber  döt het doch gopfriedschtutz mösä so ä huerä Jukebox schtoh, mit so altem Schlagerseich druf.

Und ob das nöd scho gnueg xi wär, het doch no ein vo üsnä ältärä Herrä mösä mit 2 Löffel dä Takt däzue schloh. Dä Andy het diä Sach mit denä Löffel globs no guet anä brocht, wenni nöd grad zue gloset ha.

Nochdem mer alli üsi  Bier Gläser mit  Luft bis an Bodä abä gfüllt gha hend, hemmer denn au üsi Rösser gsattlet…. Dummä seich, mer sind jo uf üsnä Füess underwägs.

Mer sind denn wieter, bis mer denn bim Diesli Dihei ah cho sind. I dem moment hets schwarzä Schnee geh. Dä Zuli isch doch no uftaucht. Nochdem äs algemeins PFUI!!!! väklungä isch hets ä wunderbari St. Galler Spezialität geh, diä 3 B, schprich: Bier, Brotwurscht und Bürli.

Unsereins het das natürli sehr gnossä.

Nochem Ässä hemmer denn dä  Nomittag mit sünnelä und dumm schnorrä väbrocht.

Üsen Mr. President het sichs uf dä Hängemattä bequem gmacht und isch halbä am chrösä xi, wo doch plötzlich irgendwohär usem Nowhere usä ä schwarzi Rägäwolkä uftaucht isch und üsän liäbä President nass gschprützt het. I ha wörkli kann Plan, wohär ass diä cho isch.
( isch usem Gartäschluch cho bim Diesli Dihei, aber psssssssst )

Schpöter isch denn dä Xävi uf d Idee cho, mich zumä 2 Kampf uf z forderä.
Ich gegä dä Xävi?!
Das isch jo wiä David gegä Goliath, aber das isch ä anderi Gschicht.
Also guet, i ha mer denn xeit gha, meh als välürä chani jo nöd und has denn mol väsuecht.
Aber so sehr i au druckt und gwürgt ha, bini trotzdem sehr bald am Bodä unä xi und plötzli sind denn alli do xi und hend mi am Bodä fescht ghaltä.
Do het denn einä mit sonerä komischä  Maschinä a miner nacktä Bruscht umä gfummlet.
Diä Habaschä hend mer doch gad mini Bruscht rasiert geg min Willä.

Janu, nochdem simmer denn bald mol wieter gschpaziert.

Wo mer denn am Bodäsee entlang trottet sind, xehni doch plötzli dä Zuli im hochä Bogä dur d Luft flügä. Het är ächt Red Bull trunkä?
Nocherä suberä Buchlandig im chüehlä Nass isch dä Monsieur usem Wasser cho und het gad ass erschts sini durchnässtä Klamottä uszogä.
Loh der das ä Lehr sii, Zuli, anerä Turnerfahrt erschient mä pünktlich. Do cha nöd jedä gad cho, wenns ehm passt.

Är isch denn nur no i sinä Underhosä wieter zottlet.
Kennet mer das nöd vo irgendwohär?

Item, mer sind denn wieder scho bald zur nögschtä ominösä bar cho, mitem Namä Traffic Bar.
Döt isch denn au churzerhand äs Schtrossäpuff eröffnet wordä und zwor eis för Frauä.
Im Ahgebot hetemer do 2 top Proschtituirti: dä Zuli und mä wörs fascht nöd glaubä, aber dä zweit isch dä Diesli xi.
Diä zwei  Gentlemen, dä Diesli etz au nur no i sinä Underhosä, hend um d Wett väsuecht vo dä hübschä Mädels än Chlapf uf dä Arsch ih z fangä, was au meh oder weniger glungä isch.

Und för d Kampftrinker hets döt nomol än Hopfätee geh.

Nocher sind mer wieter zum Bahnhof Goldach, wo mer denn in Zug Richtig St. Gallä igschtigä sind.
Irgendwiä hemmers do aber nümä gschafft, ass alli mitenand in St. Gallä ah cho sind.
i weiss no, woni am Bahnhof usgschtiegä bi, isch no dä Xävi, dä Andi dä Diesli und nomol irgendöper däbi xi. Dä Andy het denn d Idee gha, mer chöntet jo no im Trottseli eis gineah und do mer anderä eh nüt bessers im Sinn gha hend, hemmer gfundä, machemer doch.
Drum simmer denn au rächt zügig zur ebä gnanntä Beiz gschpurtet.
Churz bevor mer döt ah cho sind het üs dä gueti älteri Herr no ermahnt:
S trottseli isch äs Schtammlokal vo mer und i wöt döt no wieterhin anä, ohni dass i mi mo schemmä.

Mer Jungä hend am Andy väschprochä, ass mer ahschtendig seged und so simmer denn döt no abghockt för äs frisches Schüga.

Wo das alkohol haltigä Getränk i üs inä väschwundä  isch, simmer denn frisch gchtärcht ufs Mühleggbähnli, wo üs denn sicher uf St. Georgä ufäbrocht het.

Dobä ah cho simmer denn no in Adler inä, wo denn alli wieder zämä am sufä xi sind.
Plötzli hend denn äs paar vo üs gfundä, dä Kevin, aso dä brucht no ä Erfrischig, sus gheit dä no under dä Tisch, wenn dä asä vollä isch.
Churzum isch denn dä Herr Schaflechner packt und in Adlerbrunnä inä gschwartät wordä.
I ha no ghört sägä, är heg denn dä ganz Adlerbrunnä läär gsoffä.

Alles i allem bliebt mer etz no z sägä, isch ä super Turnerfahrt xi und i bedank mi bim organisations Team Kevin Schaflechner und Timo Brunnämeischter.
I freu mi  scho uf di nögscht Turnfahrt.